რაგბის კავშირის განცხადება 2021 წლის მორიგი საერთო კრების (ყრილობის) მოწვევის შესახებ

საქართველოს რაგბის კავშირის ოფიციალურმა ვებგვერდმა გუშინ განცხადება გამოაქვეყნა, რომლის მიხედვითაც 31 იანვარს კავშირის ძველმა გამგეობამ სხდომა დისტანციურად "ზუმის" საშუალებით ჩაატარა და ახალი საერთო კრების (ყრილობის) ჩატარების შესახებ გადაწყვეტილება მიიღო.

გამგეობას 15-დან 12 წევრი დაესწრო და საათნახევრიანმა სხდომამ მწვავედ ჩაიარა, რის გამოც გამგეობის ერთ-ერთმა წევრმა გოჩა სვანიძემ სხდომა დატოვა. სვანიძის გარდა, დღის წესრიგის დამტკიცებაზე წინააღმდეგი იყო ალექსანდრე ხვედელიძე, ხოლო დანარჩენმა წევრებმა თანხმობა განაცხადეს. სხდომის თავმჯდომარედ ალექსანდრე გრიგალავა აირჩიეს.

გამგეობის სხდომის თავმჯდომარემ განმარტა, რომ ამ სხდომის მოწვევა განპირობებულია ბოლო პერიოდში განვითარებული მოვლენებიდან - კერძოდ, 2020 წლის 30 დეკემბერს გაიმართა რაგბის კავშირის საარჩევნო ყრილობა, რომლის გამარჯვებულ კანდიდატს ირაკლი აბუსერიძეს 2021 წლის 6 იანვარს საჯარო რეესტრმა დაუხარვეზა დოკუმენტაცია. ირაკლი აბუსერიძემ რეესტრის გადაწყვეტილება 22 იანვარს გაასაჩივრა და რეესტრს პასუხის ბოლო ვადად განესაზღვრა 21 თებერვალი. გამგეობის თავმჯდომარის განმარტებით, რაგბის კავშირის წესდებით მორიგი ყრილობის გამართვა ვადად განსაზღვრულია 25 თებერვალი და საბოლოო ჯამში, ყრილობის ჩანიშვნა მოხდა 2021 წლის 24 თებერვალს. 

გამგეობის სხდომის ოქმში აღნიშნულია: "ზემოხსენებულიდან გამომდინარე გთავაზობთ, იმ შემთხვევაში თუ საჯარო რეესტრმა 2021 წლის 22 თებერვლამდე დააკმაყოფილა ირაკლი აბუსერიძის საჩივარი და დაარეგისტრირა ის რაგბის კავშირის პრეზიდენტად, დღევანდელი გამგეობის სხდომაზე მიღებული გადაწყვეტილებები გამოცხადდეს ბათილად."

ა(ა)იპ საქართველოს რაგბის კავშირის გამგეობის მოწვევით 2021 წლის 24 თებერვალს, 13:00 საათზე, ავჭალის რაგბის სტადიონის საკონფერენციო დარბაზში, მისამართზე: თბილისი, სარაჯიშვილის გამზ. 27, გაიმართება საქართველოს რაგბის კავშირის 2021 წლის მორიგი საერთო კრება (ყრილობა) შემდეგი დღისწესრიგით:

1. სრკ-ის გამგეობის ანგარიში;
2. სრკ-ის პრეზიდენტობის კანდიდატთა საერთო კრებისათვის წარდგენა, კანიდატთა გამოსვლები;
3. სრკ-ის პრეზიდენტის არჩევა;
4. სრკ-ის არჩეული პრეზიდენტის მიერ სრკ-ის გამგეობის წევრთა კანდიდატურების წარდგენა;
5. სრკ-ის გამგეობის არჩევა;
6. სრკ-ის პრეზიდენტის მიერ სრკ-ის 2021 წლის ბიუჯეტის პროექტის წარდგენა;
7. სრკ-ის 2021 წლის ბიუჯეტის დამტკიცება;
8. სხვა საკითხები.

იხილეთ ვრცლად

31 იანვარს გამართულ სხდომას და მიღებულ გადაწყვეტილებებს აპროტესტებს ირაკლი აბუსერიძის გუნდი და დღეს 11:30 საათზე ბრიფინგი დაანონსეს.

"გამარჯობა, მოგეხსენებათ, რომ გარკვეული ჯგუფები დღესაც ცდილობენ რაგბის გაჩერებას და არეულობის შემოტანას. ყველა ამ უკანონობასთან დაკავშირებით, ირაკლი აბუსერიძის გუნდის მიერ ხვალ 12-ის ნახევარზე, რაგბის კავშირში, იგეგმება ბრიფინგი!" - ვკითხულობთ ირაკლი აბუსერიძის ფეისბუქ გვერდზე.