იაშაღაშვილის დებიუტი და მელიქიძის გამარჯვება ჩელენჯ თასზე

შაბათს ჩელენჯ თასის ჯგუფური ეტაპის მეორე ტურის ხუთი შეხვედრა გაიმართა. "უოსპსი" - "აჟენის" მატჩზე უკვე ვისაუბრეთ, ახლა კი სხვა მატჩებზეც დავწერთ.

პრემიერშიპში აღზევებული "ლონდონ აირიში" ტოპ 14-ში დაბრუნებულ "ბაიონს" დაუხვდა და 45:31 დაამარცხა. ფრანგული კლუბის რიგებში დებიუტი ჰქონდა საქართველოს 20-წლამდელთა ნაკრების მესამეხაზელს იოანე იაშაღაშვილს, რომელიც მინდორზე 59-ე წუთზე გამოჩნდა.

"სტად ფრანსე" პარმაში "ძებრეს" ეწვია და რთული გამარჯვება მოიპოვა. იტალიელებმა პირველ ტაიმში გარდაუსახავი ლელო დადეს, ხოლო მეორე ტაიმში საჯარიმო ლელო. პარიზელებმა კი პირველ ტაიმში გარდასახული ლელო და ორი ჯარიმა მიითვალეს, რაც მოსაგებად საკმარისი აღმოჩნდა - 12:13. გიორგი მელიქიძე მარქაფაში იყო და მარცხენა ბურჯის პოზიციაზე 70-ე წუთზე შემოვიდა. აღსანიშნავია, რომ სტუმრებმა ბოლო 10 წუთი 13 კაცით ითამაშეს, რადგან ორი მოთამაშე გაუსინბინეს, თუმცა ამით "ძებრემ" ვერ ისარგებლა.

"კასტრმა" შინ "ვუსტერ უორიორსს" 17:9 მოუგო, ხოლო "კარდიფ ბლუზის" და "ლესტერ ტაიგერსის" დაპირისპირებაში სტუმრებმა 11:14 იმარჯვეს.