ლევან მაისაშვილი: "ამ ეტაპისთვის ოპტიმალური შემადგენლობა გვყავს"

საქართველოს ნაკრების მთავარმა მწვრთნელმა ლევან მაისაშვილმა, საფრანგეთთან მოახლოებული მატჩისთვის შემადგენლობის დასახელების შემდეგ, კომენტარი გააკეთა და აღნიშნა, რომ ამ ეტაპისთვის ოპტიმალურ შემადგენლობას მოუყარა თავი. 

„ამ ეტაპისთვის ოპტიმალური შემადგენლობა გვყავს. მცირე ტრავმა აქვს მიხეილ ნარიაშვილს, რომელიც ფიჯისთან მატჩისთვის სავარაუდოდ მწყობრში იქნება. ტრავმიდან ახალი დაბრუნებულია და ფორმაში შედის ლაშა ჯაიანი. სხვა მხრივ ყველანი ჯანმრთელად და კარგად მომზადებულები არიან. სასიხარულოა, რომ ტრავმიდან დაგვიბრუნდნენ ბექა გორგაძე, გრიგორ ქერდიყოშვილი და გიორგი ცუცქირიძე. დარწმუნებული ვარ, რომ მატჩის მსვლელობისას დიდ ძალას შეგვმატებენ შეცვლაზე მყოფი მორაგბეები“, - ციტირებს მაისაშვილის სიტყვებს რაგბის კავშირის ოფიციალური ვებგვერდი.

შეგახსენებთ, რომ საფრანგეთის და საქართველოს ნაკრებები ერთმანეთს კვირას, ქალაქ ბორდოში შეერკინებიან. მატჩი თბილისის დროით 17 საათზე დაიწყება.