შოტლანდიამ ავსტრალია ზედიზედ მესამედ დაამარცხა (VIDEO)

შოტლანდიის ნაკრები "მარიფილდზე" ავსტრალიას დაუხვდა და უაღრესად დაძაბულ ბრძოლაში 15:13 აჯობა.

შოტლანდიელები 21-ე წუთზე ჰემიშ უოტსონის ლელოთი დაწინაურდნენ, რომელიც ფინ რასელმა გარდასახა, ხოლო მე-40 წუთზე ჯეიმს ო'კონორმა ჯარიმით სხვაობა ოთხ ქულამდე შეამცირა და ტაიმი 7:3 დასრულდა.

მეორე ნახევარი ავსტრალიელთათვის კარგად დაიწყო და მიუხედავად იმისა, რომ ალან ალაალატოას გასინბინების გამო მინდორზე 14 კაცით იყვნენ, 43-ე წუთზე რობ ლეოტას ლელოთი დაწინაურება მაინც მოახერხეს, რომელიც ო'კონორმა გარდასახა და სტუმრები სამი ქულით დაწინაურდნენ. 15 წუთში შოტლანდია ევან ეშმანის გატანილი ლელოთი ისევ დაწინაურდა, ხოლო დარჩენილ დროში გუნდებმა თითო ჯარიმა გაიტანეს და შესაბამისად, გამარჯვება "ნარშავებს" დარჩათ. 

აღსანიშნავია, რომ ბოლო პერიოდში შოტლანდია ავსტრალიისთვის ერთ-ერთ ყველაზე უხერხულ მეტოქედ ჩამოყალიბდა. ამ გუნდების ბოლო სამი დაპირისპირება შოტლანდიის გამარჯვებით დასრულდა, ხოლო იქამდე გამართულ კიდევ ორ მატჩში ავსტრალიამ მხოლოდ მინიმალური სხვაობით იმარჯვა და 2015 წლის მსოფლიო თასის მეოთხედფინალში ეს მსაჯის უხეში შეცდომის წყალობით მოახერხა.