დიდი 10: ბათუმმა ბონუსით იმარჯვა და ლიდერობა კიდევ უფრო გაიმყარა

© მარიამ გაგნიძე

დიდი 10-ის მეხუთე ტურში ლიდერმა "ბათუმმა" "ხვამლი არენაზე" "იუნკერები" ბონუსით 49:7 დაამარცხა და ლიდერობა კიდევ უფრო გაიმყარა.

აჭარლებმა მოწინააღმდეგე შვიდჯერ დაალელოვეს, თავად კი ერთი გაუშვეს. ჰეთ-თრიკი გაიფორმა კვაჭმა გიორგი მენაბდემ, ხოლო თითო ლელო სანდრო ქოიავამ, ზურაბ ძნელაძემ, კობა ჯიმშელეიშვილმა და ზურა თუთბერიძემ გაიფორმეს, შვიდივე გარდასახვა კი მამუკა ნინიძემ შეასრულა ზუსტად. მასპინძელთაგან პრესტიჟის ლელო ნიკოლოზ მარჯანიშვილმა დადო, რომელიც გიორგი ჯღამაიამ გარდასახა. 

ცუდი სტარტის შემდეგ თამაში გამოასწორა და ზედიზედ მეორე მატჩი მოიგო შარშანდელმა მესამე ადგილოსანმა "აკადემიამ", რომელმაც "ყოჩები" დაძაბულ ბრძოლაში 21:25 დაამარცხა. გუნდებმა სამ-სამი ლელო გაიტანეს, რასაც "მხატვრებმა" ორი ჯარიმაც შემატეს და შესაბამისად, გამარჯვებაც მათ დარჩათ. "ყოჩების" მხრიდან დუბლი გაიფორმა კვაჭმა ლევან გენებაშვილმა, ერთი ლელო კი მესამეხაზელმა ლაშა ფოფხაძემ დადო. ლევან ობოლაძის გუნდიდან თავის გამოჩენა საბა ილურიძემ, გიორგი მიქანაძემ და მიხეილ ახობაძემ მოახერხეს.

"ლელო სარასენსმა" კი აუტსაიდერი "ყაზბეგი" შინ 27:7 დაამარცხა. მარგალიტაძის, ყორიაულის და პაპიძის ლელოებს, პრესტიჟის ლელოთი მირიან ჩქარეულმა უპასუხა.