დიდი 10: ხარები არესთან დამარცხდა

© ზურა მაჩიტიძე

დიდი 10-ის მეხუთე ტურის გახსნით მატჩში "ხარები" რუსთავში "არესს" დაუხვდა და ბევრისთვის მოულოდნელად, დამარცხდა.

"არესმა" თამაში აქტიურად დაიწყო და ტაიმის ბოლომდე, რეზო არჩვაძის ლელოთი და გიორგი თევდორაძის გარდასახვით და ორი ზუსტი ჯარიმით 0:13 იგებდა, თუმცა ტაიმის დასკვნით ხუთ წუთში "ხარებმა" ორი გარდასახული ლელო გაიტანა და პირველი ნახევარი 14:13 დასრულდა. ლელოები გიორგი კოშაძემ და დემურ ეფრემიძემ დადეს, ხოლო ორივე გარდასახვა გიორგი პეტრიაშვილმა გაიტანა. 

მეორე ნახევრის დასაწყისში "არესის" ერთ-ერთმა ლიდერმა ბადრი დანგაძემ გამოიჩინა თავი ლელოთი და ქუთაისელები კვლავ დააწინაურა, რასაც მასპინძელთაგან ერეკლე მაჭარაშვილმა უპასუხა ლელოთი და მასპინძლები სამი ქულით გავიდნენ წინ. 64-ე წუთზე "არესი" ლელოთი ჯაბა ჩეჩელაშვილმა დააწინაურა, რომელიც თევდორაძემ გარდასახა და ამ უკანასკნელმა მალევე ორი ზუსტი ჯარიმა გაიტანა, რითაც საკუთარ გუნდს ფაქტობრივად გამარჯვება გაუფორმა, რადგან მატჩის დასრულებამდე ხუთი წუთი იყო დარჩენილი და სხვაობა ათი ქულა გახლდათ. რუსთაველებმა ერთადერთი რაც შეძლეს, ეს კიდევ ერთი ლელოს გატანა და შესაბამისად, ნუგეშის ქულის აღებაა - გიორგი კოშაძემ დუბლი გაიფორმა, გიორგი ბასილაიამ კი გარდასახვა გაიტანა - 28:31.