დიდი 10: ბათუმი დამაჯერებლად ლიდერობს

© ინგა ანთია

ოთხი ტურის შემდეგ, დიდ 10-ის მოქმედი ვიცე-ჩემპიონი "ბათუმი" ლიდერობს.

"ბათუმი" საკუთარ მოედანზე "ლოკომოტივს" დაუხვდა და დამაჯერებლად 38:17 სძლია. აჭარლებმა მეტოქე ექვსჯერ დაალელოვეს, თავად სამი ლელო მიიღეს და შესაბამისად, ბონუს ქულით იმარჯვეს. პირველი ტაიმი თანაბარი იყო, გუნდებმა ორ-ორი ლელოს გატანა მოახერხეს და ტაიმი მასპინძელთა გამარჯვებით 14:12 დასრულდა. მეორე ნახევარში კი ზღვისპირელებმა დიდი უპირატესობა მოიპოვეს. დუბლით გამოირჩა ანზორ სიჭინავა, რომელსაც უკვე ხუთი ლელო აქვს გატანილი. ირაკლი ნინიძის გუნდს ოთხიდან ოთხი მოგება აქვს და გათამაშებას 18 ქულით ლიდერობს.

წარუმატებელი სტარტი აქვს მოქმედ ჩემპიონს. "აია" "ხარებთან" 14:20 დამარცხდა და შესაბამისად, მეოთხე მატჩიდან მესამე მარცხი განიცადა. ლაშა შალიკაშვილის ერთ ლელოს, ლაშა ჭავჭავაძემ ჰეთ-თრიკით უპასუხა. 

დამარცხდა მეორე ქუთაისური გუნდიც - "არესმა" შინ "ლელო სარასენსთან" 22:37 წააგო. შარშანდელმა მესამე ადგილოსანმა "აკადემიამ" პირველი გამარჯვება გაიფორმა და საკუთარ მოედანზე "იუნკერებს" ბონუსით 42:12 აჯობა, ხოლო დებიუტანტმა "ყაზბეგმა" მეოთხე მარცხი განიცადა და საშინაო მარცხი "ყოჩებთან" 12:43 დათმო.