შავმა ლომმა რუსეთში ბონუსით იმარჯვა

"შავმა ლომმა" დღეს რაგბი ევროპის სუპერ თასზე მეორე შეხვედრა ჩაატარა და პირველის მსგავსად, ამჯერადაც ბონუსით იმარჯვა.

პირველმა ქართულმა ფრენჩაიზმა პენზაში რუსეთის მოქმედი ვიცე-ჩემპიონი დაჯაბნა და დამაჯერებელი გამარჯვება გაიფორმა. პირველ ნახევარში მასპინძლებმა ორი ჯარიმა გაიტანეს, რასაც ქართველებმა სამი ლელოთი და ერთი ზუსტი ჯარიმით უპასუხეს - ლელოები შალვა მამუკაშვილმა, დავით გიგაურმა და გიორგი ბაბუნაშვილმა დადეს. ამ უკანასკნელმა ასევე ორი გარდასახვა და ჯარიმა გაიტანა. ტაიმი 6:22 დასრულდა. მეორე ნახევარში კი გუნდებმა თითო ლელო მიითვალეს. ჯერ მასპინძლებმა შეძლეს სხვაობის შემცირება, მატჩის მიწურულს კი ბონუსის მომტანი ლელო გოგა ხუროშვილმა მიითვალა - 11:27.

"ლოკომოტივის" ძირითად შემადგენლობაში იყვნენ გიორგი ჭყოიძე, ტარიელ დონაძე, ილია სპანდერაშვილი და ნიკოლოზ ცირეკიძე, ხოლო რევაზ ბროძელი თამაშში შეცვლიდან ჩაერთო. 

მომდევნო მატჩში "შავი ლომი" 30 ოქტომბერს სოჭში "ენისეის" შეერკინება.