ბექა გიგაშვილი და თორნიკე ჯალაღონია ტოპ 14-ის პირველი ტურის სიმბოლურში მოხვდნენ

საქართველოს ნაკრების მორაგბეები, ბურჯი ბექა გიგაშვილი და მესამეხაზელი თორნიკე ჯალაღონია, ფრანგული გამოცემის Rugby'O'Top-ის ვერსიით, ტოპ 14-ის პირველი ტურის სიმბოლურ გუნდში მოხვდნენ. 

გიგაშვილი "ტულონის" ძირითად შემადგენლობაში მარცხენა ბურჯის პოზიციაზე იყო და მისი ამპლუისთვის უჩვეულოდ, სრულად ითამაშა. ზღვისპირელები შინ "მონპელიეს" ბოლო წუთამდე უგებდნენ, თუმცა გაწითლებულ დროში დასანანი ლელო მიიღეს და მატჩი ფრედ 24:24 დასრულდა.

სეზონის გახსნით მატჩში "ბიარიცმა" შინ "ბორდო" 27:15 დაამარცხა. ბასკური გუნდის ძირითად შემადგენლობაში გახლდათ თორნიკე ჯალაღონია, რომელსაც ტოპ 14-ში დებიუტი ჰქონდა და ელიტური ნათლობა საკმაოდ წარმატებული გამოუვიდა. მან 75 წუთი იასპარეზა და თავისი გუნდიდან ერთ-ერთი ყველაზე აქტიური გახლდათ.