ლელო სარასენსმა დიდი 10-ის განაცხადში შავი ლომიდან ოთხი მორაგბე შეიყვანა

"ლელო სარასენსმა" პირველი ქართული ფრენჩაიზის "შავი ლომის" რიგებიდან ოთხი მორაგბე დაიმატა. 

როგორც მოგეხსენებათ, რაგბის კავშირმა მიიღო გადაწყვეტილება, რომლის მიხედვითაც დიდი 10-ის ან პირველი ლიგის თითოეულ კლუბს შეეძლება, რომ "შავი ლომის" რიგებიდან შეძლოს არაუმეტეს ოთხი მორაგბის განაცხადში შეყვანა შიდა პირველობისთვის და ეს მორაგბეები ცარიელი ფანჯრის პერიოდში თავიანთ კლუბებს დაეხმარებიან. 

"ლელო სარასენსმა" 2021/2022 წლების სეზონის დიდი 10-ის განაცხადში "შავი ლომიდან" კვაჭი თენგიზ ზამთარაძე, ბურჯი გიორგი პერტაია, ცხრა ნომერი თენგიზ პერანიძე და მესამეხაზელი სანდრო მამამთავრიშვილი დაიმატა. აღსანიშნავია, რომ პერტაია, ზამთარაძე და პერანიძე აქამდე სწორედ "ლელო სარასენსის" ღირსებას იცავდნენ, ხოლო მამამთავრიშვილი ასევე მათი აღზრდილია, თუმცა მან ბოლო სეზონი ქუთაისის "აიაში" გაატარა და საქართველოს ჩემპიონი გახდა.