ცნობილია იმ 4 მორაგბის ვინაობა, რომლებიც აიამ დიდი 10-ის განაცხადში შავი ლომის რიგებიდან შეიყვანა

ქუთაისის "აიამ" დიდი 10-ის 2021/2022 წლების სეზონის განაცხადში "შავი ლომის" რიგებიდან ოთხი მორაგბე შეიყვანა. ეს მოთამაშეები არიან: მეორეხაზელი მიხეილ ბაბუნაშვილი, მგეზავი გიორგი ბაბუნაშვილი, შუამარბი ლაშა ლომიძე და ფრთა მირიან მოდებაძე.

როგორც მოგეხსენებათ, რაგბის კავშირმა მიიღო გადაწყვეტილება, რომლის მიხედვითაც დიდი 10-ის ან პირველი ლიგის თითოეულ კლუბს შეეძლება, რომ "შავი ლომის" რიგებიდან შეძლოს არაუმეტეს ოთხი მორაგბის განაცხადში შეყვანა შიდა პირველობისთვის და ეს მორაგბეები ცარიელი ფანჯრის პერიოდში თავიანთ კლუბებს დაეხმარებიან. 

გასული სეზონის შემადგენლობის მიხედვით, "აიადან" "შავი ლომის" რიგებში რვა მორაგბე იქნა მიწვეული. წესების თანახმად, ქუთაისელებმა ოთხი მორაგბე კვლავ დაიტოვეს განაცხადში, ხოლო ბურჯი ნიკა პატარაია, მეორეხაზელი ნოდარ ჭეიშვილი და მესამეხაზელები სანდრო მამამთავრიშვილი და თორნიკე აქუბარდია "აიას" რიგებში აღარ გაირჯებიან.