რიგგარეშე ყრილობაზე საქართველოს რაგბის კავშირის ახალი გამგეობა აირჩიეს

დღეს "თბილისი მერიოტში" გამართულ საქართველოს რაგბის კავშირის ნამდვილ წევრთა რიგგარეშე საერთო კრებაზე ახალი გამგეობა აირჩიეს.

ყრილობას 39 კლუბის (41-იდან) წარმომადგენელი დაესწრო (72 ხმა, 74-იდან). ახალი წესდების დამტკიცებას უმრავლესობამ მხარი დაუჭირა - ერთმა დელეგატმა თავი შეიკავა, ერთი კი წინააღმდეგი იყო. 

მას შემდეგ, რაც ძველ გამგეობას უფლებამოსილება შეუწყდა, იოსებ ტყემალაძემ დამსწრეებს გამგეობის წევრობის ხუთი ახალი კანდიდატი წარუდგინა - მამუკა გორგოძე, ზვიად თავართქილაძე,  გიორგი კობახიძე, გივი ჭიჭინაძე და აკაკი დავითულიანი, ასევე აჭარის რეგიონის საერთო კანდიდატი გელა ქობულაძე. ტყემალაძემ ასევე წარადგინა კლუბების მიერ დასახელებული ხუთი კანდიდატი – მერაბ ანთაძე, გიორგი ქერაშვილი, ალექსანდრე ხვედელიძე, კობა გიორგაძე და დავით კაჭარავა. 11-ივე კანდიდატს საერთო კრებაზე გამოცხადებულმა დელეგატებმა ნდობა გამოუცხადეს.