ქართული მეორე ხაზი და ორი ჩვენებურის დებიუტი ანგულემის ძირითად გუნდში

"ანგულემი" და სხვა ფრანგული გუნდები სეზონისწინა მოსამზადებელი ეტაპის დასკვნით ფაზაზე გადადიან და გასახურებელ მატჩებს იწყებენ. შარანტელთა რიგებში 2021/2022 წლების სეზონში 5 ქართველი მორაგბე იასპარეზებს. 37 წლის მეორე/მესამეხაზელი შალვა სუთიაშვილი პრო დ2-დან ნასიონალში დაქვეითებულ "ანგულემში" მეშვიდე სეზონს იწყებს, ხოლო ბურჯები შოთა გოგისვანიძე და ომარ ოდიშვილი, მეორეხაზელი საბა ფესვიანიძე და მესამეხაზელი ირაკლი ცხადაძე დებიუტანტები არიან.

13 აგვისტოს თბილისის დროით 22 საათზე "ანგულემი" პირველ გასახურებელ შეხვედრას გამართავს. შარანტელები ტოპ 14-დან პრო დ2-ში გავარდნილ "ბაიონს" ესტუმრებიან. "ანგულემის" ძირითად შემადგენლობაში სამ ქართველ მორაგბეს ვიხილავთ და აქედან ორს დებიუტი ექნება. მარჯვენა ბურჯი შოთა გოგისვანიძე და მხტომელი საბა ფესვიანიძე შარანტელთა რიგებში პირველად ითამაშებენ. 20 წლის ფესვიანიძის გვერდით კი, გამოცდილი შალვა სუთიაშვილი იასპარეზებს.

ნასიონალი 5 სექტემბერს დაიწყება და "ანგულემი" პირველ ტურში გასვლაზე "ტარბის" ეთამაშება.