ჩუმაშვილის ლელო მოქმედ ჩემპიონთან და სლავას პირველი მარცხი (VIDEO)

რუსეთის ჩემპიონატის მესამე ტურში ლევან ცაბაძის გაწვრთნილი მოსკოვის "სლავა" შინ მოქმედ ჩემპიონ "ენისეის" დამარცხდა და მიმდინარე სეზონში პირველი მარცხი იწვნია - 22:33. 

"სლავას" ძირითად შემადგენლობაში გახლდათ ფულბექი ირაკლი სვანიძე, რომელმაც 43-ე წუთზე ყვითელი ბარათი მიიღო, ხოლო მარჯვენა ბურჯი ნიკა ჩუმაშვილი მარქაფში გახლდათ. ის თამაშში ძალიან კარგად ჩაერთო და 70-ე წუთზე ლელოს გატანა მოახერხა, რომელიც მიმდინარე გათამაშებაში მეორე გამოდგა. პირველი ნახევარი 3:19 დასრულდა. მეორე ნახევარში კი მოსკოველებმა ლელოებით 3:2 იმარჯვეს და სხვაობის შემცირება მოახერხეს, თუმცა ქულის ასაღებად ეს საკმარისი არ გამოდგა.

"ენისეი", რომელიც ჯერჯერობით ქართველების გარეშე ასპარეზობს, ტურნირს 14 ქულით ლიდერობს, ხოლო "სლავა" 9 ქულით მესამე ადგილს იკავებს.