"განსაზღვრული დროის შემდეგ ორ საათზე მეტი განაგრძეს დალევა" - ავსტრალიამ სამი მორაგბე დასაჯა

ავსტრალიის ნაკრების ხელმძღვანელობამ სამი მორაგბე შინაგანაწესის დარღვევის გამო დასაჯა და ახალ ზელანდიასთან 7 აგვისტოს გასამართი მატჩის წინ, ნაკრებიდან დაითხოვა. 

შაბათს ღამით, მაშინ, როდესაც "ვოლაბების" სხვა მორაგბეებს ეძინათ, მარიკა კოროიბეტე, იზი ნაისარანი და პონე ფა'ამაუსილი "კომენდანტის საათის" ამოქმედებიდან ორი საათის განმავლობაში ალკოჰოლურ სასმელებს მიირთმევდნენ. 

მომხდარით იმედგაცრუებული დარჩა "ვოლაბების" მთავარი მწვრთნელი დეივ რენი, რომელმაც აღნიშნა, რომ ტრიომ ამ საქციელით მთელ გუნდს დააღალატა.

"ჩვენ გვყავს დიდი გუნდი, ფართო 42-კაციანი შემადგენლობა. 39 მორაგბე მიხვდა, რომ ეს შეკრება მნიშვნელოვანია და ისინი ლუდს მშვიდად სვამდნენ, ხოლო სამ მოთამაშეს დისციპლინა არ აღმოაჩნდა.

ჩვენ ვისაუბრეთ, თუ რამდენად მნიშვნელოვანია ეს შეკრება და ახალ ზელანდიასთან მატჩი. ჩვენ ყველამ მაქსიმალური უნდა გავიღოთ, რომ "ოლ ბლექსთან" მატჩში საუკეთესო შედეგი ვაჩვენოთ. სამწუხაროდ, მათი ეს ქცევა არ შეესაბამება იმ მიდგომას, რომელიც ჩვენ გვჭირდება. ჩვენ იმედგაცრუებულნი ვართ და გულწრფელად რომ ვთქვა, მორაგბეების დიდი ნაწილი საკმაოდ გაბრაზებულნი არიან სამი თანაგუნდელის ამ ქცევით. 

საქმე იმაში არ არის, თუ რამდენად ნასვამები იყვნენ ისინი. აქ მთავარი ის გახლავთ, რომ ამ მორაგბეებმა დაარღვიეს შინაგანაწესი და გააგრძელეს ალკოჰოლური სასმელების მიღება იმ დროის მიღმა, რაც განსაზღვრული იყო. როდესაც ყველას უნდა დაეძინა, ეს სამი ბიჭი ავიდა ზემოთ და ორ საათზე მეტი ხნის განმავლობაში ალკოჰოლის განაგრძო", - განაცხადა რენიმ.

ამრიგად, ზემოხსენებული სამი მორაგბე 7 აგვისტოს "ოლ ბლექსთან" გასამართ მატჩს გამოტოვებს, თუმცა როგორც ცნობილია, მათი ავსტრალიაში დაბრუნება არ იგეგმება და ისინი მომდევნო მატჩებში მონაწილეობას მიიღებენ.