ბათუმმა კიდევ ორი ახალწვეული წარადგინა

სარაგბო კლუბმა "ბათუმმა" დღეს კიდევ ორი ახალწვეული წარადგინა. 

საქართველოს მოქმედი ვიცე-ჩემპიონის ფეისბუქ გვერდის ცნობით, აჭარულმა კლუბმა ბოლნისის "ყოჩების" შუამარბი გიორგი წიკლაური და კიკეთის "იუნკერების" მესამეხაზელი გუგა შენგელია დაიმატა, რომელიც წინა სეზონის დიდი 10-ის ერთ-ერთი გამორჩეული მორაგბე გახლდათ. 

"ბათუმმა" აქამდე თბილისის "ლოკომოტივის" მარჯვენა ბურჯი გიორგი ჩხარტიშვილი, მარნეულის "არმაზის" მგეზავი რეზი ჯინჭველაშვილი და ქუთაისის "აიას" შუამარბი ზურაბ ძნელაძე გაიფორმა. 

აქვე შეგახსენებთ, რომ "ბათუმი" შვიდმა მორაგბემ დატოვა. მარცხენა ბურჯი გოგა ქადარია, მესამეხაზელი გიორგი თხილაიშვილი, მგეზავი ლაშა ხმალაძე, შუამარბი გურამ ქანდაურიშვილი და ფრთა ალექსანდრე თოდუა პირველი ქართული ფრენჩაიზის "შავი ლომის" რიგებში ითამაშებენ, კლუბი ასევე დატოვა ამირან მიქაძემ, შოთა გოგისვანიძე კი კარიერას ფრანგულ "ანგულემში" განაგრძობს.