VIDEO: ტონგამ კუკის კუნძულები იოლად დაამარცხა და მსოფლიო თასის საგზურისთვის ბრძოლას განაგრძობს

2023 წლის მსოფლიო თასის საკვალიფიკაციო ეტაპზე ტონგა ახალზელანდიაში კუკის კუნძულებს ეთამაშა, მარტივად 54:10 იმარჯვა და პლანეტის პირველობისთვის ბრძოლას განაგრძობს.

როგორც იცით, ტონგა სამოასთან ორმატჩიან რაუნდში უშანსოდ დამარცხდა და ოკეანეთის ქვეყნებიდან მსოფლიო რეიტინგში ყველაზე მაღალ საფეხურზე მყოფ კუკის კუნძულებს შეხვდა. "იკალე ტაჰიმ" ტაიმი 26:10 მოიგო, ხოლო მეორე ნახევარში საკუთარი უპირატესობა კიდევ უფრო გაზარდა და 44-ქულიანი სხვაობით იმარჯვა.

ტონგა 2023 წლის მსოფლიო თასის საგზურისთვის ბრძოლას განაგრძობს და 2022 წელს აზიის თასის გამარჯვებულს, ანუ ჰონგ კონგს, სამხრეთ კორეას და მალაიზიას შორის უძლიერესს შეერკინება, რომელთაგან გამარჯვებული მსოფლიო თასის საგზურს მოიპოვებს, ხოლო დამარცხებული რეპეშაჟში გადაინაცვლებს და ბოლო, მეოცე საგზურისთვის კიდევ სამ გუნდთან ერთად იბრძოლებს.