ოლ ბლექსი 2-3 მილიონის სანაცვლოდ აშშ-ში ტესტ-მატჩს გამართავს

ცნობილი ახალზელანდიური გამოცემა New Zealand Herald წერს, რომ "ოლ ბლექსი" ევროპულ საშემოდგომო ტურნემდე ვაშინგტონს ეწვევა და აშშ-ის ეროვნულ ნაკრებთან ტესტ-მატჩს გამართავს.

გავრცელებული ინფორმაციის თანახმად, ზემოხსენებული მატჩი 23 ოქტომბერს ვაშინგტონში, "ფედექს სთედიუმზე" გაიმართება, რომელიც 82000 გულშემატკივარს იტევს. "ოლ ბლექსი" აშშ-ში სტუმრობის სანაცვლოდ დაახლოებით 2-3 მილიონ აშშ დოლარს მიიღებს.

ცნობისთვის, აშშ-ის და ახალი ზელანდიის ნაკრებები ბოლოს ერთმანეთს 2014 წელს ჩიკაგოში შეხვდნენ და "ოლ ბლექსმა" დიდი სხვაობით 74:6 იმარჯვა.

უკვე გადაწყვეტილია, რომ აშშ 30 ოქტომბერს ლას ვეგასში ირლანდიას უმასპინძლებს, ხოლო ახალ ზელანდიას ოთხი მატჩი აქვს დადასტურებული - 30 ოქტომბერს კარდიფში უელსს ესტუმრებიან, 6 ნოემბერს იტალიას ეწვევიან, 13-ში დუბლინში ირლანდიას დაუპირისპირდებიან, ხოლო 20-ში "სტად დე ფრანსზე" საფრანგეთს ეთამაშებიან.