მიხეილ გაჩეჩილაძე გაზაფხულამდე ვერ ითამაშებს, დავით მესხი რუსეთის ჩემპიონის 44-კაციან განაცხადშია

"ენისეიმ" რუსეთის ჩემპიონატის 2021/2022 წლების სეზონისთვის 44-კაციანი განაცხადი გამოაქვეყნა.

კრასნოიარსკელთა განაცხადში ერთი ქართველია - ფრთა დავით მესხი, რომელსაც საქართველოს ნაკრებში დებიუტი ივლისის ტესტებზე უნდა ჰქონოდა, თუმცა ტრავმის გამო ეს ვერ მოხერხდა. რუსეთის ჩემპიონის რიგებში არ ფიგურირებს მიხეილ გაჩეჩილაძე, რომელიც წლებია ციმბირელთა გამორჩეული ლიდერია. ამის მიზეზი "ბორჯღალოსანი" მესამეხაზელის მძიმე ტრავმაა, რომელმაც 26 ივლისს ნიდერლანდებთან მოგებულ მატჩში მუხლის ჯვარედინი მყესი გაიწყვიტა და თამაშს მარტამდე ვერ მოახერხებს. შესაბამისად, გაჩეჩილაძე "ენისეის" რუსეთის ჩემპიონატის მეორე ნახევარში დაეხმარება, რომელიც 24 ოქტომბერს დაწყებული ხანგრძლივი შესვენების შემდეგ 9-10 აპრილს განახლდება.

აღსანიშნავია, რომ "ენისეის" განაცხადში ხუთი სამხრეთაფრიკელი მორაგბე ფიგურირებს: 24 წლის ბურჯი ნიკოლას იაკობუს ესტჰუიზენი, 22 წლის კვაჭი პიჯეი იაკობსი, 29 წლის მესამეხაზელი ფრიედლი ოლივიერი, 23 წლის ფულბექი ერლ დოუვრი და 27 წლის მეორე/მესამეხაზელი კარელ დუ პრია.

"ენისეი" რუსეთის ჩემპიონატის პირველ ტურში 27 ივლისს გასვლაზე "როსტოვს" ეთამაშება, რომელიც უმაღლეს ლიგაში წელს აღზევდა.