ალან უინ ჯონსმა ტრავმა მოიშუშა და ბრიტანელ და ირლანდიელ ლომებს დაუბრუნდა

ლეგენდარულმა ალან უინ ჯონსმა ტრავმა მოიშუშა და ბრიტანელი და ირლანდიელი ლომების რიგებს დაუბრუნდა.

35 წლის მეორეხაზელმა ტრავმა 26 ივნისს იაპონიის ნაკრებთან სამხრეთაფრიკული ტურნესთვის გასახურებელ მატჩში მიიღო. მან შეხვედრის მეშვიდე წუთზე მხარი იღრძო და არსებული დიაგნოზით, "ლომების" ტურნე უნდა გამოეტოვებინა, თუმცა ვეტერანმა მეორეხაზელმა ტრავმის მოშუშება სამ კვირაში მოახერხა და 17 ივლისს კეიპ ტაუნში "სტორმერსთან" გასამართ მატჩში მონაწილეობასაც მიიღებს. ის მარქაფაში იქნება და შეცვლიდან ვიხილავთ. 

შეგახსენებთ, რომ ჯონსმა შემოდგომაზე 149-ე საერთაშორისო შეხვედრა ჩაატარა, რითაც რიჩი მაკქოუს რეკორდი დაამხო და გახდა მორაგბე, რომელსაც სანაკრებო რაგბიში ყველაზე მეტი კეპი აქვს მოხვეჭილი. ამ მომენტისთვის, ჯონსს 159 საერთაშორისო ტესტ-მატჩი აქვს გამართული - 149 კეპი უელსის ნაკრებში აქვს მოხვეჭილი, ხოლო 10 - ბრიტანელი და ირლანდიელი ლომების რიგებში. მან წლევანდელ 6 ერზე ხუთივე მატჩში მიიღო მონაწილეობა და ყველა შემთხვევაში ძირითად შემადგენლობაში იყო.  

"სტორმერსთან" მატჩში "ლომებს" შოტლანდიის ნაკრების ფულბექი სტიუარტ ჰოგი უკაპიტნებს.