მსოფლიო რაგბის რეიტინგში რამდენიმე ცვლილება მოხდა

გასულ შაბათ-კვირას ივლისის ტესტების და აფრიკის თასის ეგიდით რამდენიმე მატჩი გაიმართა, რამაც "მსოფლიო რაგბის" რეიტინგში რამდენიმე ცვლილება გამოიწვია. 

ზედა ოცეულში ცვლილებები არ მომხდარა. მე-4 ადგილზე მყოფ ირლანდიას, რომელმაც შინ იაპონია 39:31 დაამარცხა 0.16 სარეიტინგო ქულა შეემატა, ხოლო "საკურებს" მოაკლდათ. 

42-ე ადგილზე მყოფ კოტ-დ’ივუართან სენსაციური მარცხის (13:24) შემდეგ 2 სარეიტინგო ქულა დაკარგა ნამიბიამ, თუმცა 25-ე ადგილი მაინც შეინარჩუნა. თავად კოტ-დ'ივუარმა კი აქტივს 2 ქულა შემატა, 49.62 ქულა დააგროვა და 42-ედან 38-ე პოზიციამდე წაიწია წინ. მათ ფილიპინებს, მალტას, უგანდას და ტუნისს გადაუსწრეს. 

კიდევ უფრო დიდი ნახტომი გააკეთა სენეგალის ნაკრებმა, რომელმაც სტუმრად კენიას 20:19 მოუგო და 54-ე ადგილიდან 46-ე საფეხურამდე წაიწია წინ. სენეგალმა შვედეთს, კუკის კუნძულებს, მადაგასკარს, ტრინიდადი და ტობაგოს, მალაიზიას, მაროკოს, შრი ლანკას და პარაგვაის გადაუსწრო, ხოლო კენია 32-ედან 35-ე პოზიციამდე დაქვეითდა.