ოფიციალურად: გოდერძი შველიძე კვლავ ბრივის შერკინებას გაწვრთნის

საქართველოს ნაკრების ლეგენდარულმა ბურჯმა გოდერძი შველიძემ "ბრივთან" ახალი კონტრაქტი გააფორმა, რომლის მიხედვითაც მომდევნო სეზონშიც ბრიველთა შერკინების მწვრთნელი იქნება. გარდა ამისა, ის კვლავ იმუშავებს ესპუარების გუნდში.

შველიძე "ბრივის" შერკინების მწვრთნელი 2020 წლის ნოემბრის ბოლოს გახდა - მან მარკ დელ მასოს შეცვალა, რომელიც ჯანმრთელობის პრობლემების გამო დროებით სპორტს ჩამოშორდა.

43 წლის ლეგენდარული ბორჯღალოსანი, რომელსაც ტოპ 14-ში 200 შეხვედრა აქვს ჩატარებული, "ბრივში" 2012 წელს მივიდა, სადაც ოთხი სეზონი მორაგბის ამპლუაში გაატარა, შემდეგ კი სამწვრთნელო კარიერას შეუდგა და ჯამში კორეზეში ცხრა წელია მოღვაწეობს.

ამრიგად, 2021/2022 წლების სეზონის ტოპ 14-ში შერკინების ორი ქართველი მწვრთნელი იმუშავებს - გოდერძი შველიძე და დავით ზირაქაშვილი, რომელიც ერთწლიანი განშორების შემდეგ "კლერმონს" "ლა როშელიდან" დაუბრუნდა.