არგენტინის 20-წლამდელთა ნაკრებმა ურუგვაი დაამარცხა - საქართველოს მეტოქე პლეი-ოფში ცნობილია

სამხრეთ აფრიკაში მიმდინარე საერთაშორისო ტურნირის ჯგუფური ეტაპის დასკვნით მატჩში არგენტინის 20-წლამდელთა ნაკრებმა ურუგვაელი თანატოლები 35:12 დაამარცხა.

პირველი ლელოს გატანა ურუგვაელებმა მე-14 წუთზე მოახერხეს, შემდეგ კი არგენტინელებმა ორი გარდასახული ლელო გაიტანეს და ტაიმი 14:5 დასრულდა. მეორე ნახევრის დებიუტში "პუმიტასებმა" კიდევ ორი ლელო მიითვალეს, რასაც 55-ე წუთზე ურუგვაელებმა ერთი ლელოთი უპასუხეს და ანგარიში 28:12 გახდა. საბოლოო ჯამში არგენტინელებმა კიდევ ერთი ლელო დადეს და საბოლოო ჯამში 23-ქულიანი სხვაობით იმარჯვეს.

ტურნირის დასკვნითი სათამაშო დღეს 3 ივლისს გაიმართება - მე-3 ადგილისთვის მატჩში საქართველოს 20-წლამდელთა ნაკრები ურუგვაის ეთამაშება და ჯგუფურ ეტაპზე განცდილი მარცხისთვის (15:20) რევანშის აღებას შეეცდება, ხოლო ფინალში ერთმანეთს სამხრეთ აფრიკა და არგენტინა შეერკინებიან.