ზაურ თევდორაშვილმა ნასიონალში დაქვეითებული ანგულემი დატოვა და პრო დ2-ში დარჩა

© Icon Sport

22 წლის მარჯვენა ბურჯმა ზაურ თევდორაშვილმა ნასიონალში დაქვეითებული "ანგულემი" დატოვა და კარიერას პრო დ2-ში აღზევებულ "ბურგ-ენ-ბრესში" განაგრძობს. აღნიშნულ ინფორმაციას ფრანგული გამოცემები charentelibre.fr და Allrugby.Com ავრცელებენ.

თევდორაშვილი "ანგულემში" 2018 წლიდან თამაშობდა და ამ დროის განმავლობაში პრო დ2-ში 27 შეხვედრა ჩაატარა. ის საქართველოს 20-წლამდელთა ნაკრებში ასპარეზობდა და 2019 წლის ახალგაზრდულ მსოფლიო ჩემპიონატზე 5 მატჩში მიიღო მონაწილეობა. 

აღსანიშნავია, რომ "ანგულემში" თევდორაშვილს ასევე ქართველი ბურჯი შეცვლის - 29 წლის შოთა გოგისვანიძე, რომელიც საფრანგეთში სათამაშოდ "ბათუმიდან" გადავიდა. 

"ბურგ-ენ-ბრესში" კიდევ ერთი ქართველი მორაგბე ასპარეზობს - 26 წლის მარცხენა ბურჯი ვაჟა კაპანაძე, რომელმაც ნასიონალის განვლილ სეზონში 18 შეხვედრა ჩაატარა და 1 ლელო გაიტანა.