ირლანდიამ რეპეშაჟის ფინალში საფრანგეთი დაამარცხა და ტოკიოს ოლიმპიადის საგზური მოიპოვა

©INPHO/Manuel Blondeau

18-20 ივნისს მონაკოში ლუი II-ის სახელობის სტადიონზე რაგბი 7-ში ტოკიოს ოლიმპიური თამაშების რეპეშაჟი გაიმართა. 12 კაცთა და 12 ქალთა ნაკრებს უკანასკნელი შანსი ჰქონდა, რომ ოლიმპიადის დარჩენილი საგზური მოეპოვებინა.  

ტოკიოს საგზურს 7-კაცაში მხოლოდ რეპეშაჟის გამარჯვებული გუნდი მოიპოვებდა, ხოლო 7-ქალაში ორი საგზური გახლდათ დარჩენილი და შესაბამისად, ამომავალი მზის ქვეყანაში ფინალისტიც გაემგზავრებოდა. 

7-კაცას ტურნირზე პანდემიის გამო ტურნირს თავიდანვე გამოეთიშნენ ბრაზილია და ჩინეთი, ხოლო უგანდა ბოლო მომენტში გამოაკლდა შეჯიბრებას, რადგან მათ შემადგენლობაში ინფიცირებული მას შემდეგ გამოვლინდა, რაც გუნდი უკვე მონაკოში გახლდათ ჩასული.

რაც შეეხება 7-კაცას ტურნირს ჯგუფურ ეტაპზე "ა" ჯგუფში პირველ ადგილზე ირლანდია გავიდა, მეორეზე კი სამოა და ისინი ნახევარფინალში გავიდნენ, სადაც მათი მეტოქეები მეორე ჯგუფის გამარჯვებული საფრანგეთი და მეორე ადგილოსანი ჰონგ-კონგი იყვნენ. 

საფრანგეთმა ნახევარფინალში სამოა 31:0 დაამარცხა, ირლანდიამ კი ჰონგ კონგს 28:5 სძლია და ფინალში ევროპელები გავიდნენ. ფრანგებმა პირველ ტაიმში 12:7 იმარჯვეს, თუმცა მეორე ნახევარში ირლანდია ბევრად უკეთ გამოიყურებოდა, მოწინააღმდეგეს სამი გარდასახული ლელო დაუდო, თავად ერთი მიიღო და საბოლოო ჯამში 28:19 იმარჯვა, შესაბამისად ირლანდიამ დარჩენილი ტოკიოს ოლიმპიადის საგზური მოიპოვა.

აღსანიშნავია, რომ მეორე ევროპული ნაკრები, რომელიც 7-კაცას ოლიმპიადაზე ითამაშებს დიდი ბრიტანეთია. 

7-კაცას ოლიმპიური ტურნირი 26-31 ივლისს გაიმართება.