ოფიციალურად: ლევან ჩილაჩავამ კასტრთან სრულფასოვანი კონტრაქტი გააფორმა

ბორჯღალოსანმა ლევან ჩილაჩავამ "კასტრთან" სრულფასოვანი კონტრაქტი გააფორმა. აღნიშნული ინფორმაცია ფრანგული კლუბის ოფიციალურმა ვებგვერდმა დაადასტურა.

29 წლის მარჯვენა ბურჯი სეზონის ბოლოს "მონპელიეს" რომ დატოვებდა და კარიერას "კასტრში" განაგრძობდა, ეს რამდენიმე თვის წინ გახდა ცნობილი, თუმცა შექმნილი ვითარებიდან გამომდინარე, ჩილაჩავა ახალ კლუბს ნაადრევად 4 მაისს, სამედიცინო ჯოკრის სტატუსით შეუერთდა და სამი შეხვედრის ჩატარება მოასწრო. 

როგორც განცხადებაშია ნათქვამი, ლევანმა სამწლიანი კონტრაქტი გააფორმა და "კასტრში" 2024 წლის ივნისამდე ითამაშებს.

ჩილაჩავა "მონპელიეს" 2018 წელს "ტულონიდან" შეუერთდა და 38 მატჩში 4 ლელოს გატანა მოახერხა, "ტულონში" კი 2011-2018 წლებში 112 შეხვედრა ჩაატარა და მოწინააღმდეგეთა ლელო 7-ჯერ აიღო. ლევანი "ტულონთან" ერთად ერთჯერ ტოპ 14-ის, სამჯერ კი ჩემპიონთა თასის გამარჯვებული გახდა. მას საქართველოს ნაკრებში 55 კეპი აქვს მოხვეჭილი და ორ მსოფლიო თასზე უთამაშია.