ხვამლის 19 წლის მორაგბე კარიერას პრო დ2-ში განაგრძობს

თბილისის "ხვამლის" 19 წლის კვაჭი ლუკა პეტრიაშვილი კარიერას "კარკასონში" განაგრძობს. აღნიშნულ ინფორმაციას ცნობილი ფრანგული სარაგბო გამოცემა Allrugby.Com ავრცელებს, რომელიც იუწყება, რომ "კარკასონმა" ეს ტრანსფერი ოფიციალურად დაადასტურა.

პეტრიაშვილს პირველ ლიგაში თამაშის გარდა, გამოცდილება სანაკრებო დონეზე აქვს. ის საქართველოს 18-წლამდელთა ნაკრების წევრი გახლდათ და 2019 წელს კალინინგრადში გამართული ევროპის ჩემპიონატის გამარჯვებული გახდა, 2020 წელს კი 20-წლამდელთა ნაკრებში უხმეს და ახალგაზრდულ მსოფლიო ჩემპიონატზე წამსვლელთა შორის მოიაზრებოდა, თუმცა ტურნირი პანდემიის გამო გაუქმდა. 

ამრიგად, პეტრიაშვილი "კარკასონის" რიგებში მესამე ქართველი მორაგბე იქნება. ამ კლუბის ესპუარებში ირიცხებიან პირველხაზელები: 19 წლის ნუგზარ სომხიშვილი, რომელსაც უკვე ჰქონდა ძირითად გუნდში დებიუტი და პრო დ2-ში ხუთი შეხვედრის ჩატარება მოასწრო, და 21 წლის ნიკოლოზ ნარმანია, რომელსაც ძირითად გუნდში ჯერ არ უთამაშია.