VIDEO: ბიარიცის ფანების ზეიმი ტოპ 14-ში დაბრუნების შემდეგ

"ბიარიცმა" გუშინ უდრამატულეს მატჩში "ბაიონი" კარში დარტყმების სერიით 6:5 დაამარცხა (ძირითადი და დამატებითი დრო 6:6 დასრულდა) და შვიდწლიანი პაუზის შემდეგ, ტოპ 14-ში დაბრუნდა! 

მატჩი ბიარიცში გაიმართა. კოვიდ შეზღუდვებიდან გამომდინარე მატჩს 5000 გულშემატკივარი დაესწრო და გულშემატკივრების უდიდესი ნაწილი ბუნებრივია, რომ მასპინძელი გუნდის იყო. ისინი მთელი მატჩის განმავლობაში არ გაჩერებულან და შესანიშნავი ქომაგობით კიდევ ერთხელ გამოირჩნენ, ხოლო მატჩის დასრულებისთანავე უზომოდ გახარებული ქომაგი სტადიონზე შევარდა და მორაგბეებთან ერთად იზეიმა ტოპ 14-ში დაბრუნება. შემდგომ კი ზეიმმა სტადიონიდან ქალაქის ქუჩებში გადაინაცვლა და იქ გაგრძელდა. 

როგორც იცით, "ბიარიცის" ღირსებას ხუთი ქართველი მორაგბე იცავს: გიორგი ნუცუბიძე, ლუკა აზარიაშვილი, ვახტანგ ახობაძე, უჩა ჭეიშვილი და თორნიკე ჯალაღონია, რომელთაგან ბოლო სამმა ფინალურ მატჩში ითამაშა, ხოლო ნუცუბიძე და აზარიაშვილი ტრავმირებულნი არიან.