გიორგი ბაბუნაშვილი: "გამარჯვება ქუთაისელ ხალხს მივუძღვენით"

© აჩიკო გეგენავა

დიდი 10-ის ფინალურ მატჩში "აიამ" შინ "ბათუმი" 16:13 დაამარცხა და 1995 წლის შემდეგ საქართველოს ჩემპიონი პირველად გახდა, სულ კი საჩემპიონო ტიტული მეოთხედ მოიპოვა.

ფინალური მატჩის შემდეგ მცირე კომენტარი გააკეთა "აიას" მგეზავმა გიორგი ბაბუნაშვილმა, რომელმაც საკუთარ გუნდს 11 ქულა შესძინა. 

"ვულოცავ სრულიად დასავლეთ საქართველოს, ქუთაისს ამ დიდ გამარჯვებას, ნანატრ ჩემპიონობას. ძალიან დიდი ხანი, წლები ელოდა ქუთაისელი ხალხი ამ გამარჯვებას და ჩვენ მაქსიმალურად, რაც შეგვეძლო ყველაფერი გავაკეთეთ და მათ მივუძღვენით ეს გამარჯვება. ძალიან ემოციური თამაში იყო, ზუსტად ისეთი, როგორიც ფინალი უნდა ყოფილიყო. მადლობა მოწინააღმდეგე გუნდს და ვფიქრობ, რომ საოცარი სანახაობა იყო, რომელშიც ღირსეულმა გაიმარჯვა" , - განაცხადა ფინალური მატჩის საუკეთესო მორაგბემ. 

ცნობისთვის, ბაბუნაშვილმა წლევანდელ დიდ 10-ში 165 ქულა გაიტანა და ტურნირის საუკეთესო მექულე გახდა.