ოფიციალურად: ნიკა ამაშუკელი ზაფხულის ტესტებზე პირველი დონის ქვეყნებს უმსაჯებს

ქართველი რეფერი ნიკა ამაშუკელი, მსოფლიო რაგბის ისტორიაში პირველი ტიერ2  ქვეყნის წარმომადგენელია, რომელიც ტიერ1 ქვეყნის ნაკრებების მატჩს იმსაჯებს.

ის 3 ივლისს კარდიფში, 80-ათასიან „პრინციფალითი სთედიუმზე“ უელსისა და კანადის ნაკრებების შეხვედრას განსჯის, იქიდან კი რუმინეთში ჩავა და 10 ივლისს რუმინეთისა და შოტლანდიის მატჩს გაუძღვება.

შეგახსენებთ, მანამდე, 19 ივნისს ამაშუკელი 20-წლამდელთა ექვს ერზე უელსისა და იტალიის, ხოლო 25-ში ინგლისისა და შოტლანდიის დაპირისპირებას განსჯის:

„ზაფხულის საერთაშორისო მატჩების პერიოდში, 20-წლამდელთა ექვსი ერის ორ შეხვედრას ვიმსაჯებ და ვფიქრობდი, რომ მეტი დანიშვნა აღარ მექნებოდა, თუმცა, დამიკავშირდა მსოფლიო რაგბის მსაჯების ხელმძღვანელი ჟოელ ჟუში და მამცნო, რომ დანიშნული ვარ უელსი-კანადისა და რუმინეთი-შოტლანდიის მატჩებზე მოედნის მსაჯად. ეს პირველი პრეცედენტია, როდესაც ტიერ2-ის ქვეყნის წარმომადგენელი ცენტრს უმსაჯებს ტიერ1 ქვეყნის ნაკრებს“.

„ეს ძალიან დიდი პატივია. ოცნება ამიხდა, რადგან „პრინციფალითი სთედიუმზე“, სადაც პანდემიის შემდეგ, შეხვედრას პირველად დაესწრება მაყურებელი, მე ვიმსაჯებ უელსის თამაშს. ვფიქრობ, მოედანი პირთამდე იქნება გადაჭედილი. შემდეგ, სანამ შოტლანდია საქართველოში ჩამოვა, განახლებულ „არკულზე“ რუმინეთს ეწვევა და მთავარი მსაჯი აქაც მე ვიქნები. ასეთი კონკურენციის ფონზე ორ თამაშში ვიქნები ცენტრალური მსაჯი, რაც დიდი ბედნიერებაა“.

„ოთხივე თამაშის გათვალისწინებით, ქვეყნიდან ხანგრძლივი გასვლა მიწევს, რაც ადვილი ნამდვილად არ არის და ეს მენტალურ, ხოლო მოედანზე პერფორმანსი, დიდ ფსიქოლოგიურ რესურსს მოითხოვს. არაერთხელ გვისაუბრია რამდენად დიდ სტანდარტს ელიან ელიტარული მსაჯებისგან, რადგან გადაღების ხარისხი იმდენად მაღალია, ყველა დეტალი კარგად ჩანს და არაფერი უნდა გამოგეპაროს. ჩემს მენტორთან, დევიდ მაკქიუსთან ერთად, რომელიც ძალიან გახარებულია ამ დანიშვნებით და ეს სწორედ მისი დამსახურებაა, ვემზადები მომავალი თამაშებისთვის, როგორც ფიზიკურად, ასევე თეორიულად და მენტალურად“.

„მნიშვნელოვანია, მსოფლიო რაგბი ხედავდეს, რომ ჩვენ ვვითარდებით არა მხოლოდ თამაშის კუთხით, არამედ სხვა მიმართულებითაც და მაქსიმუმს გავიღებ, რათა ჩვენი ქვეყანა ვასახელო“.

8 ქვეყნის 21 საუკეთესო

მსოფლიო რაგბმა კოვიდ-რეგულაციების გათვალისწინებით, ივლისსა და აგვისტოში გასამართი 44 საერთაშორისო მატჩისთვის, 8 ქვეყნის 21 მსაჯი შეარჩია. მსოფლიო რაგბის მსაჯთა შერჩევის კომიტეტის ხელმძღვანელი გრემ მური ამბობს, რომ მსაჯები და მათ შორის ნიკა ამაშუკელი, 2023 წლის მსოფლიო თასისთვის ემზადებიან:

„ივლისის ტესტები უმნიშვნელოვანესია მსაჯთათვის, რადგან ისინი 2023 წლის საფრანგეთის მსოფლიო თასისთვის ემზადებიან. კოვიდ-რეგულაციების მიუხედავად, გაიზარდა საერთაშორისო მატჩების რაოდენობა, რაც საქმეში უფრო მეტი არბიტრის ნახვის შესაძლებლობას გვაძლევს. მოხარული ვარ, რომ ქართველ ნიკა ამაშუკელს დებიუტი ექნაბა ისეთ ტესტებზე, სადაც ექვსი ერის მონაწილე გუნდები თამაშობენ“.

რაგბის კავშირის მსაჯთა კომიტეტის ხელმძღვანელი დავით შუბითიძე ხაზს უსვამს ამაშუკელის ახალგაზრდულ ასაკს და დარწმუნებულია, რომ მომავალში ის უფრო დიდ წარმატებებს მიაღწევს:

„ნიკამ ისტორია დაწერა. ამაშუკელი მსოფლიო რაგბის თვალთახედვის არეში რამდენიმე წლის წინ მოხვდა და მას შემდეგ აკვირდებიან. მის ხასიათს, სტაბილურობას და მონდომებას უდიდესი მნიშვნელობა აქვს. ხაზგასასმელია, რომ ასაკით ის კონკურენტებზე ბევრად უმცროსია, თუმცა 10 წლით უფროსის სადარ საქმეს აკეთებს და ამას მსოფლიო რაგბიც დიდ ყურადღებას აქცევს. ზოგადად, მსოფლიო რაგბი ძალიან დიდ ყურადღებას აქცევს მსაჯთა განვითარებას და ამ მხრივ საგრძნობი პროგრესი გვაქვს, რაზეც საერთაშორისო მატჩებზე დანიშვნებიც მეტყველებს“.

მსაჯთა მენეჯერი ლუკა კილასონია ვარაუდობს, რომ ამაშუკელი გახდება პირველი ქართველი მსაჯი, რომელიც მსოფლიო თასზე იმსაჯებს:

„პირველად ისტორიაში, ტიერ1 ქვეყნის ნაკრების თამაშის მსაჯობა ქართველ რეფერის ანდეს, რაც ქართული რაგბისთვის უმნიშვნელოვანესია. დიდ 10-ში სულ 6 მსაჯი გვყავს და მათგან ერთ-ერთი მოხვდა მსოფლიოს 21 საუკეთესო მსაჯს შორის. ეს უდიდესი მიღწევაა. ახლა ჩვენზე და ნიკაზეა დამოკიდებული როგორ გაგრძელდება ეს ამბავი და მომავალშიც იქნება თუ არა მაღალი დონის დანიშვნები, თუმცა პირადად მე დარწმუნებული ვარ, რომ ეს ასე იქნება. ვერ ვიტყვით, რომ მსგავს დანიშვნებს არ ველოდით. ნიკა რეგულარულად ესწრება მსოფლიო რაგბის სემინარებს და ვვარაუდობთ, რომ 2023 წელს ის მსოფლიო თასზეც იქნება წარმოდგენილი“.

Rugby.Ge