კარკაძის პირველი მატჩი, ჯაფარიძის დაბრუნება და ცხადაძის გამოსამშვიდობებელი თამაში ბრივის რიგებში

ტოპ 14-ის რეგულარული ჩემპიონატის ბოლო ტურში "ბრივი" გასვლაზე "რასინგ 92"-ს ეთამაშება. 

"ბრივისთვის" ამ მატჩს სატურნირო თვალსაზრისით აღარანაირი მოტივაცია არ გააჩნია, რადგან კლუბმა გასულ ტურში ოფიციალურად მოახერხა ტოპ 14-ში ადგილის შენარჩუნება. შესაბამისად, ბოლო ტურში "ბრივი" გადახალისებული შემადგენლობით ითამაშებს.

წლევანდელ ტოპ 14-ში პირველად ითამაშებს კვაჭი ვანო კარკაძე, რომელმაც აგვისტოში მიღებული მძიმე ტრავმის გამო რვა თვე გამოტოვა და მინდორს აპრილში ესპუარების რიგებში დაუბრუნდა, ახლა კი ძირითად გუნდის სასტარტო თხუთმეტეულში იქნება. ასევე ძირითად შემადგენლობაშია მესამეხაზელი ირაკლი ცხადაძე, რომელიც სეზონის დასრულების შემდეგ გუნდს ტოვებს და "ბრივის" რიგებში დამოსამშვიდობებელ შეხვედრას ჩაატარებს. სასტარტოშია მგეზავი თედო აბჟანდაძე, ხოლო მარჯვენა ბურჯი ლუკა ჯაფარიძე, რომელმაც მარტში ხელი დაიზიანა და თითქმის სამი თვის გამოტოვება მოუწია - მარქაფაშია.

მატჩი შაბათს თბილისის დროით 23:05 საათზე დაიწყება.