ფიჯის ნაკრებს ახალ ზელანდიასთან მატჩებში, შესაძლოა, რამდენიმე ვარსკვლავი დააკლდეს

"მფრინავ ფიჯელებს", შესაძლოა, "ოლ ბლექსთან" ტესტ-მატჩების ჩატარება მნიშვნელოვანი დანაკლისით მოუწიოთ.

როგორც მოგეხსენებათ, ფიჯის ნაკრები ახალ ზელანდიას სტუმრად 10 და 17 ივლისს ეთამაშება. 

ფიჯური გამოცემა fbcnews.com.fj წერს, რომ "მფრინავ ფიჯელებს", შესაძლოა, ზაფხულის ტესტებზე კაპიტანი, მსოფლიოში ერთ-ერთი საუკეთესო მორაგბე სემი რადრადრა ("ბრისტოლი"), პესელი იატო ("კლერმონი"), ვაისეა ნაიათალევუ ("სტად ფრანსე") და ლევანი ბოტია ("ლა როშელი") არ ჰყავდეთ. საქმე იმაშია, რომ ზემოხსენებული მორაგბეების გუნდები ტოპ 14-ის და პრემიერშიპის პლეი-ოფებში იასპარეზებენ. ორივე ტურნირის ფინალური მატჩები 26 ივნისს გაიმართება, რაც იმას ნიშნავს, რომ თუ ამ მორაგბეების გუნდები თავიანთი ჩემპიონატების ფინალში გააღწევენ, "ოლ ბლექსთან" გასამართ მინიმუმ პირველ შეხვედრას გამოტოვებენ. 

პირველ რიგში გასათვალისწინებელია ის ფაქტი, რომ ახალ ზელანდიაში ძალიან მკაცრი საკარანტინე რეგულაციები არსებობს და ამის გამო, თუ რომელიმე ფიჯელი მორაგბის გუნდი ტოპ 14-ის ან პრემიერშიპის ფინალში გავა, ისიც არაა გამორიცხული, რომ საერთოდ ორივე მატჩის გამოტოვება მოუწიოთ. თითოეულ მოთამაშეს საკუთარ კლუბთან ვალდებულება გააჩნია, ივნისში არც "მსოფლიო რაგბის" მიერ გამოყოფილი სანაკრებო ფანჯარა მოქმედებს და შესაბამისად, ევროპული კლუბებისგან ფინალში გასვლის შემთხვევაში მოთამაშეების გათავისუფლება გამორიცხულია.