ქართველების ბიარიცმა უდრამატულეს ნახევარფინალში იმარჯვა და პრო დ2-ის ფინალში გავიდა (VIDEO)

პრო დ2-ის მეორე ნახევარფინალურ მატჩში "ვანი" საკუთარ მოედანს "ბიარიცს" დაუხვდა და უდრამატულეს მატჩში, გაწითლებულ დროში გაშვებული გარდასახული ლელოთი მინიმალური სხვაობით 33:34 დამარცხდა.

"ვანმა" სამი გარდასახული ლელო და ოთხი ჯარიმა გაიტანა, ხოლო ბასკებმა ხუთი ლელო დადეს, რომელთაგან სამი გარდასახეს და ერთი ჯარიმა შეასრულეს ზუსტად. 80 წუთის ამოწურვის შემდეგ მასპინძლები 33:27 იგებდნენ, თუმცა გაწითლებულ დროში "ვანის" დაცვა უხეშად შეცდა, "ბიარიცის" მორაგბეებმა კი ხაზის გაჭრა მოახერხეს და გავინ სტარკმა ძელებს შუა ბურთი დაამიწა, გარდასახვა კი ჟილეს ბოშმა მარტივად გაიტანა და ბასკები პრო დ2-ის ფინალში გავიდნენ, სადაც 6 ივნისს მონპელიეში კატალონიურ "პერპინიანს" შეერკინება. გამარჯვებული ტოპ 14-ში აღზევდება, ხოლო დამარცხებული ტოპ 14-ის მე-13 ადგილოსანს პლეი-აუტში დაუპირისპირდება და ელიტაში გადასვლის მეორე შანსი ექნება. 

"ბიარიცის" რიგებში მოედანზე მე-5 წუთზე გამოჩნდა მარცხენა ბურჯი უშანგი ჭეიშვილი, ხოლო მესამეხაზელი თორნიკე ჯალაღონია სასტარტო შემადგენლობაში იყო და 62 წუთი საკმაოდ მაღალ დონეზე ჩაატარა. მარქაფაში იყო მარჯვენა ბურჯი ვახტანგ ახობაძე, თუმცა მინდორზე არ გამოჩენილა.