პერპინიანმა შინ ოიონა დამაჯერებლად დაამარცხა და პრო დ2-ის ფინალში გავიდა (VIDEO)

პრო დ2-ის ნახევარფინალურ მატჩში "პერპინიანი" "სტად ემ-ჟირალზე" "ოიონას" დაუხვდა და ფინალში დამაჯერებელი გამარჯვებით გავიდა. 

კატალონიელებმა მეტოქეს ოთხი უპასუხო ლელო გაუტანეს, ხოლო სტუმრებმა მხოლოდ ჯარიმებით მოიპოვეს ქულები და ლიონელ ბოქსისმა ხუთი ჯარიმა შეასრულა ზუსტად. ამრიგად, "პერპინიანმა" 27:15 იმარჯვა და პრო დ2-ის ფინალში გავიდა, სადაც 6 ივნისს მონპელიეში ბასკურ "ბიარიცს" შეერკინება. გამარჯვებული ტოპ 14-ში აღზევდება, ხოლო დამარცხებული ტოპ 14-ის მე-13 ადგილოსანს პლეი-აუტში დაუპირისპირდება და ელიტაში გადასვლის მეორე შანსი ექნება.

ამ მატჩში "პერპინიანის" რიგებში ქართველ მორაგბეებს არ უთამაშიათ, "ოიონას" ძირითადში მარჯვენა ბურჯი ირაკლი მირცხულავა გახლდათ, რომელმაც საწყისი 33 წუთი ითამაშა, ხოლო მარცხენა ბურჯი ბექა კაკაბაძე მარქაფაში იყო და მინდორზე 73-ე წუთზე გამოჩნდა.