არგენტინის ნაკრების ახალი კაპიტნის ვინაობა ცნობილია

არგენტინის ნაკრებს ივლისის მოახლოებულ ტესტებზე კვაჭი ხულიან მონტოჟა უკაპიტნებს. აღნიშნული ინფორმაცია რამდენიმე წუთის წინ "პუმების" ოფიციალურმა ვებგვერდმა დაადასტურა.

როგორც მოგეხსენებათ, ბოლო სანაკრებო მატჩებამდე "პუმებს" მესამეხაზელი პაბლო მატერა კაპიტნობდა, რომელსაც ნოემბერში ცხრა წლის წინანდელი "ტვიტერის" პოსტები ამოუქექეს, რომელშიც ის რასისტულ და ქსენოფობიურ განცხადებებს აკეთებდა. მის გარდა, ანალოგიურ სკანდალში გაეხვივნენ გვიდო პეტი და სანტიაგო სოსინო. სკანდალში გახვეული სამივე მორაგბე ნაკრებში კვლავ გამოიძახეს, მაგრამ მატერა მინიმუმ ივლისის ტესტებზე, კაპიტანი აღარ იქნება.

მონტოჟას არგენტინის ნაკრებში 63 კეპი აქვს მოხვეჭილი და 9 ლელოს გატანა მოახერხა. მან 2015 და 2019 წლების მსოფლიო თასებზე იასპარეზა. ხულიანმა წლევანდელ პრემიერშიპში "ლესტერ ტაიგერსის" რიგებში 4 მატჩი ჩაატარა და 3 ლელო მიითვალა.

შეგახსენებთ, რომ არგენტინის ნაკრები 10 და 17 ივლისს კარდიფში უელსს ეთამაშება.