ესპანეთის ნაკრების მორაგბე პოს დატოვებს და კარიერას ბეზიეში განაგრძობს

ესპანეთის ნაკრების ერთ-ერთმა გამორჩეულმა მორაგბემ შარლი მალიმ "პო" დატოვა და კარიერას "ბეზიეში" განაგრძობს.

29 წლის ფულბექმა მშობლიურ კლუბთან, რომლის ღირსებასაც 2010-2014 წლებში იცავდა (73 მატჩი, 6 ლელო), სამწლიანი კონტრაქტი გააფორმა. 

"ვამბობდი და ვიმეორებ, რომ ეს იყო იდეალური კარიერული გეგმა, რომ დასრულებული იყო იქ, საიდანაც ყველაფერი დაიწყო. რაგბის თამაში აქ დავიწყე, სპორტის და გუნდურობის სიყვარულიც აქ ვისწავლე. მე ნამდვილად ბედნიერი ვარ, რომ აქ დავბრუნდი. იმედი მაქვს, რომ ჩვენ წარმატებული წლები გვექნება და მივაღწევთ იმას, რასაც ჩვენი კლუბი იმსახურებს", - განაცხადა მალიმ. 

მალიმ 2014-2015 წლები "მონტობანში" გაატარა (20 მატჩი, 2 ლელო), საიდანაც "პოს" მიაშურა, სადაც ექვსი სეზონი გაატარა და 131 მატჩში 9 ლელო მიითვალა. მას ესპანეთის ნაკრების კვართით 16-ჯერ უთამაშია.