დავით მესხმა ფინალურ მატჩში ლელო გაიტანა - ენისეიმ ლოკომოტივი იოლად დაამარცხა (VIDEO)

რუსეთის ჩემპიონატის ფინალური სერიის პირველ მატჩში "ენისეი" "ავანგარდზე" "ლოკომოტივს" დაუხვდა და ბევრისთვის მოულოდნელად საკმაოდ იოლად 48:6 იმარჯვა.

კრასნოიარსკელთა ძირითად შემადგენლობაში იყვნენ მესამეხაზელი მიხეილ გაჩეჩილაძე და ფრთა დავით მესხი. პენზელთა სასტარტო შემადგენლობაში მარჯვენა ბურჯი ტარიელ დონაძე, კვაჭი გიორგი ჭყოიძე, მესამეხაზელი ილია სპანდერაშვილი და შუამარბი ნიკოლოზ ცირეკიძე იმყოფებოდნენ, ხოლო ღერძი რევაზ ბროძელი შეცვლაზე შევიდა. 

შეხვედრის 34-ე წუთზე ლელოს გატანა ბრწყინვალე ფორმაში მყოფმა დავით მესხმა მოახერხა, რომელმაც ბოლო სამ მატჩში მეოთხე ლელო მიითვალა. ქართველმა ფრთამ "კრასნი იართან" ორ ნახევარფინალურ მატჩში სამი ლელო დადო. 

"ენისეიმ" მეტოქე ექვსჯერ დაალელოვა. კრასნოიარსკელებმა ტაიმი 24:6 მოიგეს, ხოლო მეორე ნახევარში კიდევ უფრო დიდი უპირატესობა მოიპოვეს.