ოფიციალურად: ჟორჟ სალდაძემ ბეზიესთან კონტრაქტი გაახანგრძლივა

© Icon Sport

მარცხენა ბურჯმა ჟორჟ სალდაძემ "ბეზიესთან" კონტრაქტი ორი წლით გაახანგრძლივა. აღნიშნული ინფორმაცია ოქსიტანიური კლუბის ოფიციალურმა ვებგვერდმა დაადასტურა. 

სალდაძე, რომელსაც 27 წელი 25 მაისს შეუსრულდება, "ბეზიესთან" მოქმედი კონტრაქტი 30 ივნისს ეწურებოდა.

"ძალიან ბედნიერი ვარ, რომ ჩემთვის და ჩემი ოჯახისთვის "ბეზიეში" თავგადასავალი გრძელდება", - განაცხადა სალდაძემ ახალი ხელშეკრულების გაფორმების შემდეგ. 

"ჟორჟი არის ძალიან კარგი მოთამაშე მარცხენა ბურჯის პოზიციაზე. ის არის ძლიერი, როგორც შერკინების სტატიკაში, ასევე ღია თამაშში. ჩვენ მას მომდევნო ორი სეზონის განმავლობაში ვენდობით და ეს მისთვის არის პლაცდარმი, რომ საკუთარი პოტენციალი სრულად გამოავლინოს", - განაცხადა "ბეზიეს" შერკინების მწვრთნელმა პიერ კელემ.

სალდაძე "ბეზიეში" 2019 წელს ქუთაისის "აიადან" გადავიდა და 16 მატჩში 2 ლელოს გატანა მოახერხა. მან წლევანდელ პრო დ2-ში 10 შეხვედრა ჩაატარა, საიდანაც 7 შემთხვევაში ძირითად შემადგენლობაში იყო და 1 ლელო დადო.