დიდი 10: აიამ შინ იუნკერები ბონუსით დაამარცხა და რეგულარული ჩემპიონატის გამარჯვებული გახდა

© აჩიკო გეგენავა

დიდი 10-ის რეგულარული ჩემპიონატის ბოლო ტურში "აია" შინ "იუნკერებს" დაუხვდა და ბონუსით 29:14 დაამარცხა. 

ქუთაისელებმა მეტოქე ხუთჯერ დაალელოვეს, თავად კი ორი ლელო მიიღეს. მასპინძელთაგან დუბლი გაიფორმა ზურაბ ძნელაძემ, თითო ლელო კი მიხეილ ბაბუნაშვილმა, დავით კლდიაშვილმა და თორნიკე აქუბარდიამ დადეს. თითო გარდასახვა გიორგი ბაბუნაშვილმა და სანდრო ფურცხვანიძემ შეასრულეს ზუსტად. მატჩის საუკეთესო მორაგბედ სწორეედ ფურცხვანიძე დასახელდა. სტუმართაგან ლელოები რატი ქურასბედიანმა და გიორგი მჭედლიშვილმა გაიტანეს, რომლებიც რამაზ ხარაზიშვილმა გარდასახა. 

"აიამ" 36 ქულა დააგროვა და რეგულარული ჩემპიონატის გამარჯვებული გახდა. არ გაიმართა "ბათუმის" და "ლოკომოტივის" დაპირისპირება, რომელიც დიდი 10-ის ფეისბუქ გვერდის ცნობით, თბილისელთა გამოუცხადებლობის გამო არ შედგა. აღნიშნულ ფაქტს უახლოეს დღეებში განიხილავს სადისციპლინო კომისია., თუმცა ნებისმიერ შემთხვევაში, "ბათუმისთვის" "აია" მიუწვდომელი იქნება.