ოლ ბლექსმა, შესაძლოა, ფიჯისთან მატჩებამდე კიდევ ერთ მეორე დონის ქვეყანასთან ითამაშოს

ახალი ზელანდიის ნაკრებმა, შესაძლოა, ფიჯისთან მატჩებამდე კიდევ ერთი ტესტ-მატჩი გამართოს. tvnz.co.nz იუწყება, რომ ახალი ზელანდიის რაგბის კავშირი 3 ივლისს ტონგასთან შეხვედრას განიხილავს. 

გავრცელებული ინფორმაციის თანახმად, აღნიშნული მატჩის გამართვის დიდი ალბათობა არსებობს და მასპინძელად ორი ქალაქი განიხილება: ოკლენდი და ჰამილტონი. ეს ტონგელთათვის უმნიშვნელოვანესი თამაში იქნება, რადგან 10 და 17 ივლისს ისინი ორმატჩიან დუელში სამოას დაუპირისპირდებიან და გამარჯვებული მსოფლიო თასის საგზურს ოკეანეთის 1-ის სტატუსით მოიპოვებს. 

ახალი ზელანდიის და ტონგის ნაკრებები ერთმანეთს ბოლოს 2019 წლის მსოფლიო თასის დაწყებამდე შეხვდნენ და "ოლ ბლექსმა" დიდი სხვაობით 92:7 იმარჯვა. 

შეგახსენებთ, რომ "ოლ ბლექსი" ფიჯისთან მატჩებს 3 და 10 ივლისს გამართავს.