მაიკ ბრაუნის ბინძური თამაში, პირველი წითელი ბარათი კარიერაში და მკაცრი, მაგრამ განახევრებული სასჯელი

ინგლისის ნაკრების ყოფილი ფულბექი მაიკ ბრაუნი ბინძური თამაშისთვის ექვსკვირიანი დისკვალიფიკაციით დასაჯეს. 

35 წლის ბრაუნმა, რომელსაც 2007-2018 წლებში ინგლისის ნაკრებში 72-ჯერ უთამაშია, კვირას "უოსპსთან" მოგებული (48:46) მატჩის 44-ე წუთზე წაქცეულ მეტოქეს სახეზე ფეხი დააბიჯა და უეინ ბარნისგან წითელი ბარათი დაიმსახურა. აღსანიშნავია, რომ ბრაუნმა იქამდე მე-19 წუთზე ყვითელი ბარათი მიიღო. 

"ჰარლექუინსის" გამოცდილ მორაგბეს, რომელსაც ლონდონური კლუბის მაისურით 336 მატჩში 91 ლელო აქვს გატანილი, 15-წლიანი პროფესიონალური კარიერის განმავლობაში წითელი ბარათი არასდროს ჰქონდა მიღებული და ყველაზე მკაცრი სასჯელი პირველად მიიღო. დამოუკიდებელი სადისციპლინო კომიტეტის აზრით, ბრაუნის ქმედება 12-კვირიან დისკვალიფიკაციას ითვალისწინებდა, თუმცა მათ მორაგბის საოცრად სუფთა კარიერა გაითვალისწინეს და ამიტომ, სასჯელი გაუნახევრეს. 

ამრიგად, ბრაუნისთვის წლევანდელი პრემიერშიპი დასრულდა და სავარაუდოდ, "ჰარლექუინსის" რიგებშიც ბოლო შეხვედრა ჩაატარა, რადგან გავრცელებული ინფორმაციის თანახმად, ის სეზონის დასრულების შემდეგ კლუბს დატოვებს.