ჟაკ ნინაბერი: "დარწმუნებული ვარ, რომ ეს ჩვენს მოთამაშეებში სულისკვეთებას აამაღლებს"

გუშინ ოფიციალურად დადასტურდა, რომ სამხრეთ აფრიკის ნაკრები 3 და 10 ივლისს საქართველოს უმასპინძლებს. 

ეს იქნება "სპრინგბოკსის" პირველი შეხვედრა 2019 წლის მსოფლიო თასის ფინალის შემდეგ. პანდემიის გამო სამხრეთ აფრიკამ გასულ წელს ვერც ტესტები გამართა და ვერც რაგბი ჩემპიონშიპში მიიღო მონაწილეობა. ამრიგად, "ქურციკებს" პირველად გაუძღვება ახალი მთავარი მწვრთნელი ჟაკ ნინაბერი, რომელიც "ბორჯღალოსნებთან" ტესტ-მატჩების დანიშვნით კმაყოფილია. 

"საქართველოსთან გასამართი ტესტების დადასტურებამ და ბრიტანელი და განვლილ კვირას ირლანდიელი ლომების მიერ შემადგენლობის გამოაცხადებამ ჩვენში დიდი აღფრთოვანება გამოიწვია. დარწმუნებული ვარ, რომ ეს ჩვენს მოთამაშეებში სულისკვეთებას აამაღლებს. ახლა ჩვენ შეგვიძლია დავაჩქაროთ ჩვენი სამზადისი საერთაშორისო რაგბიში დასაბრუნებლად", - განაცხადა ნინაბერმა.