ოფიციალურად: არმაზი დიდი 10-დან გავარდა, ლელო სარასენსი - ელიტაში დარჩა

დიდი 10-ის გამოტოვებულ მატჩში "ლელო სარასენსი" "ლელო არენაზე" "არმაზს" დაუხვდა და დიდი სხვაობით 45:14 დაამარცხა.

"არმაზისთვის" ეს გადამწყვეტი მატჩი იყო, რადგან მხოლოდ გამარჯვების შემთხვევაში შეინარჩუნებდა დიდ 10-ში დარჩენის შანსს ბოლო ტურის წინ, თუმცა თამაშის სცენარიდან გამომდინარე, მათ ამის შანსი არ ჰქონიათ. შეხვედრის ბედი პირველივე ტაიმში გადაწყდა, "ლელო სარასენსმა" მეტოქეს ხუთი უპასუხო ლელო დაუდო და ტაიმი 33:0 მოიგო. მეორე ნახევარში კი გუნდებმა ორ-ორი ლელო დადეს და მასპინძლებმა ბონუსით იმარჯვეს, რითად ელიტაში დარჩენა ოფიციალურად გაინაღდეს.

მასპინძელთაგან დუბლით გამოირჩა არჩილ აბესაძე, რომელიც მატჩის საუკეთესო მორაგბედ დასახელდა. თითო ლელო თენგიზ პერანიძემ, თენგიზ ზამთარაძემ, ოთარ ლაშხმა, აკაკი ტაბუცაძემ და დემე თაფლაძემ მიითვალეს, ხოლო სტუმართაგან ლელოები სანდრო სვანიძემ და ბესო ბარბაქაძემ დადეს. 

ამრიგად, "არმაზი" მომდევნო წელს პირველ ლიგაში გაატარებს. მესამე ადგილზე კი "არესი" გავიდა, რომელიც პლეი-აუტში ორმატჩიან დაპირისპირებაში "არმიას" შეერკინება დიდი 10-ის საგზურისთვის.