ფრანგული პრესა: ლუკა გოგინავა ანგულემს დატოვებს

© Icon Sport

24 წლის ბურჯი ლუკა გოგინავა მიმდინარე სეზონის დასრულების შემდეგ "ანგულემს" დატოვებს. ამის შესახებ, ფრანგული გამოცემა Charentelibre.Fr წერს.

"ანგულემს" პრო დ2-ის დასრულებამდე ორი ტურით ადრე 41 ქულა აქვს, ბოლო ადგილზე იმყოფება და მე-14 ადგილოსან "ორიაკს" 8 ქულით ჩამორჩება, რაც იმას ნიშნავს, რომ შარანტელები ნასიონალში დაქვეითდებიან. აქედან გამომდინარე, გოგინავა, რომელიც კლუბის ერთ-ერთი წამყვანი მოთამაშეა, სამუშაო ადგილს შეიცვლის და უფრო ამბიციურ, მაღალი მიზნებისთვის მებრძოლ გუნდში გადავა. 

გოგინავა "ანგულემში" 2019 წელს "ბრივიდან" გადავიდა და 46 მატჩში 3 ლელო დადო. ის წლევანდელ რაგბი ევროპის ჩემპიონატზე საქართველოს ნაკრებში პირველად გამოიძახეს, თუმცა თამაში არ მოუწია. ლუკა საქართველოს 20-წლამდელთა ნაკრების წევრი გახლდათ და 2016 წლის ახალგაზრდულ მსოფლიო ჩემპიონატზე 3 მატჩში 1 ლელოს გატანა მოახერხა. 

შეგახსენებთ, რომ "ანგულემის" ღირსებას იცავენ შალვა სუთიაშვილი და ზაურ თევდორაშვილი.