ბექა გიგაშვილი ტოპ 14-ის კვირის სიმბოლურ გუნდში მოხვდა

© Icon Sport

საქართველოს ნაკრების და "ტულონის" ბურჯი ბექა გიგაშვილი ტოპ 14-ის კვირის სიმბოლურ გუნდში მოხვდა, რომელიც ავტორიტეტულმა სარაგბო გამოცემა "მიდი-ოლიმპიკმა" შეადგინა.

გასულ კვირას ტოპ 14-ში ოთხი გამოტოვებული შეხვედრა გაიმართა. "ტულონმა" "სტად მაიოლზე" ბოლო ადგილოსანი "აჟენი" ბონუსით 34:17 დაამარცხა. ტულონელთა ძირითად შემადგენლობაში გახლდათ მარჯვენა ბურჯი ბექა გიგაშვილი, რომელმაც მინდორზე 61 წუთი გაატარა და მორიგი დასამახსოვრებელი მატჩი შემოგვთავაზა. "ბორჯღალოსნების" პირველხაზელის კარგი თამაში კი ზემოხსენებულ გამოცემას შეუმჩნევლად არ დარჩენია და კვირის საუკეთესო თხუთმეტეულში შეიყვანა.

29 წლის გიგაშვილმა წლევანდელ ტოპ 14-ში მეათე შეხვედრა ჩაატარა, საიდანაც 6 შემთხვევაში ძირითად შემადგენლობაში იყო და 1 ლელოს გატანა მოახერხა.