ირლანდია სასურველ მოწინააღმდეგეებთან მოლაპარაკებებს აწარმოებს - სამყურებს ორი საშინაო ტესტი სურთ

რამდენიმე დღის წინ ცნობილი გახდა, რომ ირლანდია ზაფხულის ტესტებზე ფიჯიში ვეღარ გაემგზავრება და სამმატჩიან ტურნეს ვერ გამართავს. მიზეზი კოვიდ 19-თან დაკავშირებით არსებული გაურკვევლობა და მკაცრი შეზღუდვებია.

ირლანდიის რაგბის კავშირმა უმალ ალტერნატიულ ვარიანტებზე დაიწყო ფიქრი და როგორც ცნობილი გამოცემა Independent-ი წერს, "სამყურები" მოლაპარაკებებს აშშ-სთან და იაპონიასთან აწარმოებენ. ირლანდიელებს სურთ, რომ არსებული დეფიციტი აღნიშნულ ქვეყნებთან ტესტ-მატჩებით შეავსონ, რომელთაც "ავივა სთედიუმზე" დაუხვდებიან.

იაპონიის ნაკრები 28 ივნისს ედინბურგში, "მარიფილდზე" ბრიტანელ და ირლანდიელ ლომებს გასახურებელ ტესტ-მატჩში შეერკინება. ირლანდიელები იაპონელებს სთავაზობენ, რომ ბრიტანეთის კუნძულებზე დარჩნენ და ტესტ-მატჩი გამართონ, რაც წესით "საკურებსაც" უნდა აწყობდეთ, რომლებიც არაოფიციალური ინფორმაციის თანახმად, 17 ივლისს ბუქარესტში რუმინეთს ესტუმრებიან, ხოლო 7 აგვისტოს ბრისბენში ავსტრალიას ეწვევიან. 

რაც შეეხება აშშ-ს, "არწივებს" დაგეგმილი ჰქონდათ, რომ ინგლისის ნაკრებისთვის ემასპინძლათ, თუმცა ბოლო პერიოდში გავრცელებული ცნობის თანახმად, შესაძლოა, ამერიკელებს და კანადელებს მოუწიოთ კუნძულებზე სათამაშოდ ჩასვლა. ასევე ცნობილია, რომ აშშ-სთან და კანადასთან საშინაო ტესტ-მატჩების ჩატარება სურს უელსსაც, რომელსაც დაგეგმილი სამხრეთამერიკული ტურნე გაუუქმდა, სადაც არგენტინის და ურუგვაის ნაკრებების წინააღმდეგ უნდა ეთამაშა.