ოფიციალურად: ევროთასების ფინალების მასპინძელი სტადიონი ცნობილია

2020/2021 წლების ჩემპიონთა და ჩელენჯ თასების ფინალური მატჩების მასპინძელი სტადიონი ცნობილია. EPCR-ის (ევროპის პროფესიონალური საკლუბო რაგბი - ავტ.) ოფიციალური ვებგვერდის ცნობით, წლევანდელი ევროთასების გადამწყვეტ შეხვედრებს ლეგენდარული "თვიქნემ სთედიუმი" უმასპინძლებს. 

თავდაპირველად იგეგმებოდა, რომ ფინალური მატჩები მარსელში "ველოდრომზე" ჩატარებულიყო, მაგრამ პანდემიასთან დაკავშირებული არსებული სირთულეების გამო, უპირატესობა ლონდონს მიენიჭა, ხოლო მარსელი ევროთასების ფინალებს მომდევნო 2022 წელს უმასპინძლებს.

ჩელენჯ თასის ფინალი 21 მაისს გაიმართება, ხოლო ჩემპიონთა თასის ფინალი 22 მაისს შედგება. ყველაზე მნიშვნელოვანი კი ის გახლავთ, რომ ფინალურ მატჩებს გულშემატკივრები დაესწრებიან. "თვიქნემი" 82000 გულშემატკივარს იტევს და კოვიდ 19-ის სრული რეგულაციების დაცვის გათვალისწინებით, დაახლოებით 10 000 გულშემატკივრის დაშვება მოხდება. უკანასკნელად "თვიქნემმა" ევროთასების გადამწყვეტ შეხვედრებს 2014/2015 წლების სეზონში უმასპინძლა. 

ასევე ცნობილია, რომ 2023 წლის ევროთასების ფინალებსაც ლონდონი უმასპინძლებს. ოღონდ - "ტოტენჰემ ჰოთსპურ სთედიუმი", რომელიც 62850 გულშემატკივარს იტევს.