უელსის ნაკრების ვარსკვლავი ბრიტანელი და ირლანდიელი ლომების სამხრეთაფრიკულ ტურნეს გამოტოვებს

უელსის ნაკრების და "ოსპრისის" ვარსკვლავი ჯორჯ ნორსი, ივლის-აგვისტოში გასამართ ბრიტანელი და ირლანდიელი ლომების სამხრეთაფრიკულ ტურნეს გამოტოვებს.

ნორსი პრო 14-ის "ცისარტყელას თასის" პირველ ტურში "კარდიფ ბლუზთან" მოგებული (36:14) მატჩის 45-ე წუთზე დაშავდა და მოედნის დატოვება მოუწია. როგორც გაირკვა, ნორსს წინა ჯვარედინი იოგები აქვს გაწყვეტილი, ოპერაცია ჩაუტარდა და მოედანს ხანგრძლივი პერიოდით ჩამოშორდა. 

ჯორჯს უელსის ნაკრებში 102 კეპი აქვს მოხვეჭილი და 43 ლელოს გატანა მოახერხა. მას ბრიტანელი და ირლანდიელი ლომების 2013 (ავსტრალია) და 2017 (ახალი ზელანდია) წლების ტურნეზე უთამაშია და ტრავმა რომ არ მიეღო, ლომების სამივე ტრადიციულ მეტოქესთან ექნებოდა ნათამაშები.