ოფიციალურად: საქართველო - შოტლანდიის ტესტ-მატჩის გამართვის თარიღი ცნობილია

საქართველოს და შოტლანდიის ნაკრებების მატჩი 17 ივლისს გაიმართება - აღნიშნული ინფორმაცია ცოტა ხნის წინ შოტლანდიის რაგბის კავშირის ოფიციალურმა ვებგვერდმა დაადასტურა. ზუსტი დრო და ლოკაცია ამ მომენტისთვის დადასტურებული არ გახლავთ და მოგვიანებით გახდება ცნობილი.

როგორც იცით, ზაფხულში ბრიტანელი და ირლანდიელი ლომების სამხრეთაფრიკული ტურნე შედგება. ლომების სამწვრთნელო შტაბში იქნება შოტლანდიის ნაკრების მთავარი მწვრთნელი გრეგორ თაუნსენდი და ასევე დაცვის მწვრთნელი სტივ ტენდი. "ნარშავებს" დროებით მაიკ ბლერი უხელმძღვანელებს. წამყვანი ვარსკვლავებიც სამხრეთ აფრიკაში გაემგზავრებიან, ხოლო ვინც ლომების შეკრებაზე ვერ მოხვდება, ჩვეულებრივ ზაფხულის ტესტ-მატჩებზე იასპარეზებენ. 

ისინი 10 ივნისს ბუქარესტში რუმინეთს ესტუმრებიან, ხოლო შემდეგ გეზს საქართველოსკენ აიღებენ და 17 ივლისს ითამაშებენ.

შეგახსენებთ, რომ შოტლანდიის ნაკრები თბილისს 2019 წლის 31 აგვისტოს ეწვია და 44:10 იმარჯვა. სულ კი ერთმანეთის წინააღმდეგ ხუთჯერ უთამაშიათ და ყველა შემთხვევაში "ნარშავებმა" გაიმარჯვეს. 

რუმინეთის ნაკრები 2006 წლის შემდეგ ტიერ 1-ის ქვეყანას მსოფლიო თასებს მიღმა პირველად შეხვდება, ხოლო 2004 წლის შემდეგ შინ პირველად მიიღებენ. სულ კი რუმინეთს და შოტლანდიას ერთმანეთის წინააღმდეგ 13-ჯერ უთამაშიათ, საიდანაც ორჯერ "მუხებმა" იმარჯვეს, ხოლო 11-ჯერ "ნარშავებმა".