იოან უჟემ უმძიმესი ტრავმა მიიღო და შესაძლოა, კარიერის დასრულება მოუწიოს (+VIDEO)

ტოპ 14-ის 22-ე ტურში "ტულუზი" საკუთარ მოედანზე "რასინგ 92"-ს დაუხვდა და 34:16 სძლია.

მასპინძელთა რიგებიდან პირველი ლელოს გატანა 27-ე წუთზე იოან უჟემ მოახერხა. საფრანგეთის ნაკრების ყოფილი გარემარბისთვის ეს ლელო, შესაძლოა, კარიერაში ბოლო აღმოჩნდეს, რადგან ლელოს დადებიდან შვიდ წუთში უმძიმესი ტრავმა მიიღო და მოედანი ექიმების დახმარებით ისე დატოვა, რომ მარჯვენა ფეხს მინდორზე საერთოდ ვერ ადგამდა. 

უჟემ აქილევსის მყესი გაიწყვიტა და როგორც იწერება, დიდი შანსია, რომ კარიერის დასრულება მოუწიოს. მას სასწრაფო ოპერაცია უკვე ჩაუტარდა, რომელმაც წარმატებით ჩაიარა და იოანი თავს კარგად გრძნობს. ოპერაციის დასრულების შემდეგ, მან გულშემატკივრებს გვერდში დგომისთვის მადლობა გადაუხადა და აღნიშნა, რომ თუ რა მოხდება მომავალში და შეძლებს თუ არა მინდორზე დაბრუნებას, ამას დრო გამოაჩენს.

ცნობისთვის, უჟე, რომელსაც 2 ივნისს 34 წელი შეუსრულდება, საფრანგეთის ნაკრებში 2010-2019 წლებში ასპარეზობდა და 62 მატჩი 14 ლელოს გატანა მოახერხა. ის "ტულუზის" სარაგბო სკოლის აღზრდილია და ძირითად გუნდში დებიუტი 2005 წელს ჰქონდა. მან 2008 წელს "აჟენს" მიაშურა, შემდეგ კი ასევე ორი სეზონი "ბაიონში" გაატარა, რის შემდეგაც 2012 წელს მშობლიურ კლუბს დაუბრუნდა. უჟეს ჯამში "ტულუზის" მაისურით 170-ჯერ უთამაშია და მოწინააღმდეგეთა ლელო 59-ჯერ აიღო.